http://cjitl.org

CJITL flash,Tuir fontes konfirmadu husi Gabinete Komisaun Anti Korupsaun  katak  Aderito de Jesus sei  fo posse ba nia  adjuntu nain rua Iha Farol, Dili, Ohin 16/03.

Nia haktuir tan katak ami  halo preparasaun  ba ceremonia  toma de posse  adjuntu komisariu nian aban,tamba ne’e  mak ohin dadersaan Komisariu Aderitu ba  hasoru malu Prezidente da Republika interinu Fernando Lasama de Araujo atu koalia  konaba  ceremonia aban,hateten fontes ne'e iha nia servisu fatin Farol horseik.

“Aban (Ohin - red) ceremonia toma de  posse halo iha  fatin ne’e duni edifisiu KAK iha iha tuku 05 lorokraik  no  media hotu-hotu sei mai halo kobertura  kona ba seremonia refere” Fontes ne'e haktuir.

Komisariu Komisaun Anti Korupsaun - KAK, Aderito de Jesus, Kinta semana kotuk ofisialmente fo sai naran kandidatu nain rua ne’ebe atu tu’ur iha kadeira adjuntu KAK nian.

“Hau anunsia nomeisaun Manuel Coutinho Bucar Corte Real nudar komisariu adjuntu ba prevensaun no Jose Antonio de Jesus das Neves nudar komisariu adjuntu ba Edukasaun Kompane  no Peskiza”, informa komisariu Aderito iha Dili.

Nia dehan nomeisaun ne’e hare’e husi sira nia esperensia no abilidade, sira sei bele fo kontribuisaun substansial ba komisaun no ninia luta hasoru korupsaun.

Eis advogadu ne’e mos dehan Bucar nudar ema akademiku respeitavel ida iha Timor Leste, nomos hala’o knar hanesan Dekanu Fakuldade Ekonomia iha Universidade Timor Leste (UNTL) husi 2001 to’o 2006.

Iha tinan 2006, Bucar sai nudar Komisairu Nasional Eleitoral iha eleisaun chefe Suku no entre 2006 to’o 2007 nia kaer knar mos hanesan Inspektur Jeral ba Governu Timor Leste.

Nune’e mos kandidatu seluk, Jose Antonio de Jesus durante okupasaun sai nudar ativista movimentu foinsa’e nian.

No iha konsulta popular Neves hala’o servisu iha NGO Nasional no Internasional hanesan kaer kn’ar nudar jestor projeitu hasa’e kapasidade lideransa iha Dezenvolvimentu Ekonomiku ne’ebe Banku Mundial mak organiza. (Calisto/CJITL)