CJITL Exclusive, Relasiona ho tomada de pose ba Provedor Direitus Humanus no Justisa (PDHJ) ne’ebe tuir lolos halo iha Sexta semana kotuk maibe serimonia ne’e kansela husi Provedor rasik tamba nia hakarak atu simu posse ho adjuntu nain rua.

Tamba ne’e segunda feira ohin provedor rasik haruka ona karta ida ba Prezidenti Parlamentu Nasional- PN atu iha Kinta ou Sexta semana ne’e, karik PN iha tempu bele ona fo posse ba ninia estrutura. 

Atu hatene diak liu tan infromasaun kompletu tuir intervista exlusiva reporter CJITL, Emilia Martires  ho Provedor Eleitu Sebastião Diaz Ximenes, Segunda feira 15/03 ne’e iha nia servisu fatin Kaikoli-Dili.

 

CJITL: Tamba saida mak ita adia fali loron tomada de pose foin lalais ne’e?
Sebastião Dias Ximenes (SDX): Sim, hau mak adia duni tomada de posse ne’e tamba, hau lakohi atu akontese tan hanesan uluk, hodi gasta parlamentu sira nia tempu, tamba ne’e mak hau hakarak hili tiha hau nia adjuntu nain rua maka ami sei simu tomada de posse hamutuk, tamba ne’e ohin hau haruka ona karta ida ba prezidente PN katak hau prontu ona atu simu tomada de posse hamutuk ho adjuntu nain rua, iha Kinta ka Sexta semana ne’e.

CJITL: Tuir ita planu se mak ita boot fo fiar/hili ona atu sai adjuntu hodi servisu hamutuk iha PDHJ?
SDX: Hau hakarak hateten deit katak adjuntu nain rua maka hau hili tiha ona no ida hau hasoru tiha ona. Husi ema nain rua ne’e nia background mai husi jurista hotu, tamba ema hotu-hotu hakarak atu iha mudansa, maibe mudansa ne’e ita labele halo mudansa ida drastika, ita halo mudansa, ne’ebe adjuntu nain rua ne’e, ida sei kontinua no ida sei hili fali foun. Tamba se ita troka hotu adjuntu rua ou mai ho adjuntu foun hotu, entaun ita tenki hahu servisu foun hotu.

Ivo Valente/foto, CJITL

CJITL: Tuir informasaun katak ita boot konvida Ivo Valente atu servisu hamutuk, ne’e los ka lae?
SDX: Sim, Hahu kedas hau konvida Sr. Ivo Valente maka ema primeiru ne’ebe hau konvida atu bele servisu hamutuk ho hau, maibe guvernu iha tiha ona planu ida ba nia, ne’ebe nia labele mai ajuda hau.

CJITL: Ita boot bele fo sai naran Adjuntu nain rua ne’e ba CJITL?
SDX:  Provedor seidauk bele fo sai adjuntu nain rua ne’e nia naran, tamba hau hakarak atu halo ema hakfodak (surprise) ida ba publiku.(Emy/CJITL)