CJITL flash, Partidu Fretilin liu husi nia komunikadu politika ne’ebe hasai, Terca feira semana ne’e iha Dili hateten katak husu ba Governu no Parlementu Nasional atu hapara totalmente konstrusaun ba Otel Fitun Lima iha Tasitolu tamba fatin ne’e konsidera hanesan fatin sagradu laos fatin atu halimar Golf ou toba iha Kama Kuxu.

“Tuir bankada FRETILIN nia hanoin, fatin nee presiza hetan investigasaun tomak, tamba tuir informasaun bele iha tan mate ruin ita nia aswain barak neebe militar Indonesia hakoi subar iha neeba.  Ita hotu rona no koalia katak iha Tasi Tolu, iha Tibar no sorin besik neeba fatin neebe bapak sira gosta hakoi ita nia aswain neebe hetan oho husi sira” komunikadu ne’e hateten.

Tamba ne’e mak bancada FRETILIN ezigi, tenke para konstrusaun ofisialmente no notifika ofisialmente ba uma fukun ida nee husi autoridade kompetente katak ida nee halo duni, too peritus forensico sira satisfeito katak mate ruin la iha tan.

Komunikadu ne’e haktuir liu tan katak Lolos fatin nee  hetan ona rekonesimentu husi estadu katak labele sai tan buat seluk hanesan hotel, ka fatin halimar golf, ka toba iha kuartu luxu fali, tamba nee sai fatin ema aswain ita nian fatin mate sagradu atu ita hetan ita nia soberania nasional.

Iha Deklarasaun ne’e mos sita katak ita tenke konsidera ho kuidadu no ho didiak, tamba tuir ami nia hare, fatin nee Lulik ona husi ponto de vista ita nia historia funu nian. Oin seluk, bainhira governu ida nee kontinua autoriza ida nee hodi sai hotel luxu “fitun lima” “Pelican Paradise Resort,” maibe hotel luxu fitun lima ida nee hamrik iha mate ruin aswain sira nia leten. (*/CJITL)