Forca Australia, dok

CJITL flash, Forsa Australianu ne’ebe durante krizi 2006  to’o agora hala’o misaun fo siguransa ba povu Timor Leste deskobre hala’o mos misaun politika iha rai laran.

Informasaun ne’ebe Centru Jornalista Investigativu Timor Leste (CJITL) deskobre liu husi komunikadu imprensa Organizasaun Non Govermental La’o Hamutuk katak iha Suco Lore I, Sub Dsitritu Lospalos, Distritu Lautem esplika katak Forsa Australianu no Nova Zelandia halo enkontru ho komunidade hodi husu konaba apoiu governu Xanana ka governu Fretilin.

Soldadu hirak ne’e halibur komunidade iha loron 23 Fulan Fevereiru, wainhira tun husi helicopter no husu komunidade atu foti liman karik sira prefere governu Aliansa Maioria Parlamentar (AMP) diak liu kompara ho governu Fretilin nian uluk.  

Liu husi ONG La’o Hamutuk, Xefe Suco Lore, husu ba forsa Australiano sira atu labele interven direitu komunidade nian atu livre hala’o sira nia politika no labele obriga povu hodi publika sai sira nia esperasaun politika tanba ne’e bele estraga povu nia liberdade.

Nune’e mos tuir komunikadu ne’e katak iha, Timor Leste nu’udar nasaun demokrasia sempre garantia sidadaun nia direitu atu suporta partidu politiku ruma ne’ebe legal tuir sira nia hakarak.

Iha relatoriu krizi 2006 wainhira Soldadu Autralia tama iha nasaun foun ida ne’e sempre fo presaun ba sidadaun Timor Leste hodi kontra lider individual ida ka grupo ida.

Xefe suku Lore I, Mateus Fernandes Sequiera liu husi karta rekomendasaun ho numeru 01/ADM/SL.I/III/2010 ne’ebe dirizi ba NGO La’o hamutuk katak nia rasik la konkorda ho atetude soldadu forsa Australia no Nova Zelandia sira ne’ebe husu ba nia komunidade atu foti liman hodi hili governu ne’ebe mak sira prefere.

“Hau nudar  Xefe Suco ladun konkorda mak liafuan balun ne’ebe fo sai iha momentu ne’eba”, dehan Xefe suco ne’e.

“Tanba sira husu ba komunidade katak governu anterior ho governu agora AMP agora ne’e ida ne’ebe mak diak liu no husu mos ba komunidade para aseita governu AMP ne’e foti liman”.

Tuir lider komunitariu ne’e katak hahalok soldadu hirak ne’e atu kria instabilidade iha komunidade nia let tanba interven ema nia direitu atu livre hili partidu politiku ruma.

To’o notisia ne’e hatun ami sei tenta hela atu husu klarifikasaun husi parte komandu Forsa Stabilizasaun Internasional (FSI) iha Dili.(*/Atay)