CJITL Flash, Relasiona ho preokupasaun deputadu husi opozisaun ne’ebe kestiona konaba arguidu Kiak no Alberto ne’ebe simu subsidiu hamutuk U$1.600 husi governu iha tinan kotuk tanba konsidera nudar forsa 2020, rejeita totalmente husi Sekertariu Estadu Defeza, Julio Thomas Pinto.

Deputada Fernanda Borges iha Parlamentu Nasional, Tersa ne’e  hateten arguidu Kiak ho Alberto simu osan subsidiu husi guvernu liu husi Ministeriu Solidariedade Sosial-MSS US$ 1.600,00 iha fulan Dezembru tinan kotuk tamba sira pertensia ba forsa Vinti-vinti.

Florindo de Jesus alias “KIAK”no Alberto da Costa Belo akuzadu tanba involve iha krizi politika militar iha tinan 2006 hodi tiru mate membru Polisia Nasional Timor Leste (PNTL) iha Rotunda Kaikoli-Dili no ema sivil ida iha Becora Mota Ulun.

Iha fulan kotuk liu husi Tribunal Distrital Dili fo ona sentesa ba arguidu KIAK tinan 8 fulan 6 no Alberto da Costa Tinan 6 fulan 6.

Maibe governu liu husi SED la rekuinese arguidu nain rua nudar membru husi forsa 2020 ne’ebe governu planu.

No tuir Eis observador politika no militar ne’e katak arguidu nain rua ne’ebe simu osan subsidiu husi Ministeriu Solidariedade Sosial ne’e tanba konsidera nudar vitima ba krizi 2006 maibe la’os tanba hanesan membru forsa 2020.

“Hau nu’udar SED hau so esplika dokumentu ofisial ne’ebe koalia konaba planu forsa 2020 ne’ebe mai husi 2005 nian”, dehan Julio.

Agora deklarasaun ne’ebe hateten katak ami selu osan ba sira ne’e lalos, tuir investigasaun SED nian katak osan ne’ebe sira simu ne’e  estadu rekuinhese duni hanesan mos vitima IDP’s sira iha kriji 2006, sira selu duni ba grupu balun inklui Kiak ho nia kolega sira, sira simu duni osan husi vitima kriji 2006, laiha dokumentu legal ida esplika katak sira forsa 2020”, dehan Thomas Pinto.

Nia mos esplika konaba vizaun forsa 2020 katak presiza iha planu ne’ebe diak hodi dezenvolve forsa iha rai ida ne’e.

Tanba ne’e nia husu ba deputada husi Partidu Unidade Nasional, Fernanda Borges atu koalia sukat ibun wainhira hato’o politika partidu iha plenaria tanba bele halo konfuzaun ba komunidade hodi intreperta asuntu forsa vinti-vinti ne’e.

Nune’e mos Sekertariu Estadu Defeza ne’e deklara katak rumores dehan KIAK no Alberto nudar membru forsa vinti-vinti ne’e hanesan rumores falsu.(Emy/CJITL)