Trio Komisariu KAK, ist.

CJITL flash, Seremonia tomada de posse ba Adjuntu komisariu nain rua, ba  Komisaun Anti Korupsaun - KAK hala’o tiha ona, no sira deklara pronto atu limpeza abut korupsaun iha Timor Leste.

Argumentu fiar an ne’e hato’o Komisariu Komisaun Anti Korupsaun (KAK), Aderito de Jesus Soares, Tersa feira ne’e iha edifisiu KAK Farol-Dili durante seremonia posse ne’e.

“Komisairu KAK hateten honra boot tebes ba nia atu fo posse ba adjuntu nain rua ne’e hodi bele servisu hamutuk atu hare’e asuntu Korupsaun Kolusaun no Nepotismu (KKN) iha nasaun lafaek ne’e.

Nia promete sei esfrosu an hamutuk ho adjuntu nain rua ne’e hodi lori instituisaun foun ne’e ba futuru ne’ebe nabilan no diak.

Tanba tuir Eis advogadu ne’e katak adjuntu nain rua ne’e la’os ema ne’ebe foun iha politika Timor Leste nian. Ho ida ne’e nia garante katak sei iha mudansa servisu ba asuntu kombate KKN iha rai ida ne’e.

“Ita hakat tan pasu importante ida tamba Jose Antonio das Neves ho Manuel Coutinho Bucar Corte Real  la’os ema foun iha  politika Timor leste nian” dehan Aderito de Jesus.

 

Manuel Coutinho  Bucar Corte  Real promete katak iha tempo besik nia laran sei halo mudansa ba servisu kombate korupsaun.

“Hau sei dedika hau nia a’an tomak  no halao hau nia dever  ho matenek ne’ebe hau iha  ho responsabilidade  bo’ot ne’ebe tau iha hau nia kabas  iha institusaun  Komisaun Anti Korupsaun KAK, Bucar haktuir”.

Nune’e mos Jose Antonio das Neves  adjuntu ba komisariu Asuntu Edukasaun Kampaina  no Peskiza ne’e katak atu bele alkansa susesu iha  servisu Komisaun  Anti Korupsaun presiza apoiu husi institusaun sira seluk.(Calisto/CJITL)