Francisco de Araujo/CJITL foto

CJITL Flash, Fatin servisu Prezidente Republika ne’ebe besik los abrigu soldadu militar Australia no Nova Zelandia ladun iha preokupasaun husi lideransa iha nasaun foun ne’e maske movimentu helikoptru sempre halo barulhu lor-loron.

Reprezentante povu iha uma fukun parlamentu nasional preokupa konaba kondisaun ne’ebe refere tanba fatin servisu Xefe Estadu Jose ramos Horta baliza ho abrigu Forsa Estabilizasaun Internasional (FSI) nian.

Francisco de Araujo husi bankada Asosiasaun Sosial Demokrata Timor (ASDT) mos duvida konaba atividade iha palasiu prezidente Horta nia tanba lor-loron helikopteru sempre semo no halo baruilhu.

Tanba tuir nia katak iha nasaun seluk fatin servisu prezidenti nian iha situasaun ne’ebe hakmatek los maibe iha Timor Leste ne’e situasaun oin seluk fali tanba fatin Horta hamutuk ho abrigu forsa nian.

“Hau lahatene ita nia Prezidente sente no hare ka lae problema ida ne’e tamba iha nasaun seluk  ita hare fatin servisu Prezidente nian ne’e hakmatek”, dehan deputadu ne’e iha PN, Kuarta, (17/03). “Hau mos la hatene keta ita nia Prezidente mos gosta karik”.

Tuir nia lolos Prezidente tenki hare’e buat hirak ne’e no bele muda tiha sira ba fatin seluk ne’ebe mak serve ba forsa sira atu nune’e lalika interonpe servisu Xefe Estadu nian.

Hanoin hanesan mos mai husi deputadu opozisaun Fretilin, David Dias Ximenes maibe nia dehan sira labele foti dezisaun no dezisaun ne’e tenki mai husi Xefe Estadu rasik.

“Hau mos lahatene no labele foti desizaun tamba keta ita nia Prezidente Ramos Horta mos gosta karik ho buat sira ne’e hotu ne’e duni atu interompe ka la interompe ne’e Prezidente mak sente ne’ebe hau labele foti desizaun ruma dehan atu muda forsa sira ne’ebe hela besik Palacio Prezidente ne’e” dehan  nia. (Thomas/CJITL)