Eis Gerileiru Mate Moris

CJITL Flash, Pagamentu IV Governu Konstituisional ne’ebe ladun justu hetan prostesa husi antigus kombatentes balun tanba governu la rekuinhese sira nia luta maibe fo fali rekuinesementu ba eroi falsu sira.

Mateus do Santos alias Mate Moris ne’ebe uluk luta hamutuk ho komandante rejiaun ida, Corneilo Gama alias L7 ne’e to’o agora seidauk hetan kondekorasun husi governu atual.

“Hau nia dokumentus hanesan deklarasaun veteranus, sertidaun batismo, kartaun klandestina hirak ne’e ha’u prepara kleur ona no hau lori mai hatama iha diresaun ba asuntu veteranus iha distritu Manufahi”, dehan Mate Moris, Tersa ne’e iha Dili. “Maibe tinan tolu nia nia laran ha’u la hetan rekoinhesementu ida husi estadu”.

Mate Moris ne’ebe uluk sai membru Forca Militar Indonezia ou Tentara Nasional Indonesia (TNI ) nu’udar mos autor  ida hamutuk ho komandante L-7 ba operasaun FALINTIL iha sub-Distritu Alas Distritu Manufahi iha tinan 1999.

“Hau kontinua halo protesta ba iha Ministeriu Solidaridade no Sosial  tamba la iha resposta ba dokumentu ne’ebe trata tinan 3 nia laran maibe governu kontinua selu heroi falsu”, tenik nia.

 

Tanba la hetan atensaun husi devizaun antigus kombatentes iha distritu Manufahi, maka nia kontinua halo tratamentu mai nasional maibe esforsu hirak ne’e nafatin saugate deit tanba seidauk hetan resposta husi ministeriu ne’ebe kompetente.

“Durante fulan rua ona ha’u seidauk hetan resposta nafatin hau nia maluk sira hetan”, nia dehan.

Mate Moris arepende tebes ho nia kontribuisaun ba nasaun soberania ida ne’e to’o hetan libertasaun maibe ikus mai laiha rekoinhesimentu, katak nia.

 

“Diak liu haruka tiha hau ba iha nasaun seluk tamba ha’u nu’udar sidadaun Timor ne’ebe estadu Timor rasik la koinhese”, nia hateten.

 

Antes ne'e governu fo ona kondekorasaun ba ema rihun ba rihun iha antigus kombatentes, klandestina no loriku asuwain maibe nafatin mos iha ema barak mak seidauk hetan rekuinhesementu husi governu ne’ebe lidera husi Eis Gureileiru, Xanana Gusmao.(Mariano/CJITL)