Deputado Natalino dos Santos

CJITL Flash, Natalino dos Santos, eis jurista Timor oan ida ne’ebe servicu iha Tribunal durante tinan 16 hahu tempu okupasaun Indonezia, molok ikus mai sai nu’udar deputado ida tur iha parlementu nasional hodi reprezenta bankada CNRT sei lansa tan muzika foun iha 2012 konaba Xanana Gusmao, Ramos Horta no Falintil.

Nu’udar deputado loron – loron tenki halo vida politika hodi debate konaba asuntu povu nian liu husi halo lei no fiskalizasaun.

Anata, nu’udar naran istima husi deputado ne’ebe sempre simu diak jornalista bainhira hakarak husu atu halo intervista.

Hanesan La’en ba Ana Filomena Christina, aleim de hanesan politiku ida nia mos hanesan Xefe familia iha uma laran.

“Hau nudar Xefe de Familia hau mos eduka hau nia oan estuda no oinsa aban bainrua moris sai diak, nune’e mos hare uma laran” hateten Natalino ba reporter CJITL iha nia servicu fatin, Parlementu Nasional, Kuarta , loron 17 Marcu.

Bainhira fila ba uma, Natalino uja nia tempu loraik no kalan hodi le livru konaba politiku no mos akompanya noticia iha Televizaun Timor Leste.

“Dalaruma hau fila ba uma hau le livru politiku no dezenvolvimentu barak li-liu konaba lei sira ne’e, tamba ho lian portugues buat ne’ebe mak hau la hatene tenke buka fila fali ho dicionariu hodi bele komprende” Natalino hateten ho hamnasa oitoan.

“Hau mos fo tempu atu akompanya TVTL para hare informasaun iha ita nia rai laran ne’e, no gosta mos rona Radio hanesan Radio Voz no Radio Timor Kmanek –RTK” Natalino konfesa tan.

Iha Tempu Indonezia, Natalino mos lanca nia muzika ida ne’ebe oras ne’e toka bebeik iha radio sira ho titulu “Xanana Riku Abut Timor Nian”.

“Konaba muzika iha tempu Indonesia nian hau halo muzika ida ho nia Titlu Xanana riku abut Timor Nian, e agora dadaun hau prepara hela muzika ida ba eleisaun 2012 nian, ho nia titlu ida konaba Xanana Lideransa masimu, Ramos Horta hanesan Frente Diplomatika, Falintil nudar forsa halo funu iha Ailaran, no Joventude As’wain ne’ebe halo funu iha Vila laran, muzika ne’e mos hau sei kanta wainhira halo kampania iha 2012” Natalino hateten ho konfiansa.

Katuas oan husi Ana Filomena Kristina informa katak Muzika ne’e mos bele fanun fila fali nasionalismu Timor oan sira nian ba rai ida ne’e para oinsa bele hadomi rai ida ne’e to’o fim.
Natalino nu’udar mane ida ne’ebe sempre halo tuir nia promesa.

Bainhira sei tu’ur iha Eskola Sekundaria nia hakarak iha oan nain rua deit hakarak feto ida mane ida maske ikus mai oan nain rua ne’e mesak mane deit.

Oan nain rua ne’e ida naran Francisco João Da costa dos Santos klase 5 no Vasco de Carvalho dos Santos  klase 3 eskola iha Esternatu São Jose.

“Hau hakarak oan rua deit tamba hau hare liu ba sira nia futuru, hau hakarak sira nia futuru iha planeia ida ne’ebe mak diak” hateten aman ne’e.

Aman husi oan nain rua ne,e hatutan katak Konaba desportu hau gosta hare joga bola li-liu husi tim Portugal nian, bainhira Portugal sira joga hau buka tempu,para hau bele nonton.(Domingos Dasilva/CJITL)