CJITL flash, Ministru Turismo, Comersio no Industria – MTCI, Gil da Costa Alves liu husi konferensia ba imprensa, Kinta feira ohin konfirma katak nia sei la rejigna an husi nia kargu tamba ema ne’ebe iha kompetensia atu hasai nia mak Xefe Governu la’os publiku ou membru deputados.

“Hau sei la rejigna an, ema ne’ebe bele halo evaluasaun ba hau nia servicu no bele hasai hau mak Xefe Governu deit la’os tan ema seluk, hau  sei la rejigna an” Gil konfirma ba jornalistas ohin.

Relasiona ho distribuisaun fo’os ne’ebe diskunfia iha manipulasaun husi MTCI rasik, Gil defende katak funsionario MTCI la halo manipulasaun maibe grupo spekulador balun hanesan emprezariu sira mak aproveita fali prosesu distribuisaun fos ne’e.

“Xefe suco sira mos la sala, governu ou funsionariu sira mos la sala, ema ne’ebe sala mak naok ten sira no spekulador sira ne’ebe gosta aproveita tempu” Gil hatutan.

Ba oin, MTCI sei la distribui tan fos ba komunidade liu husi Xefe Suco, oras ne’e MTCI halo ona restruturasaun atu hadia jestaun fa’an fos.

“Ba oin, kada familia sei hetan kartaun ida, depoiz ho kartaun ne’e mak familia ida sei sosa fos governu nian ho marka MTCI tuir nesesidade familia nian, no familia ida sei sosa deit fos tuir numero membru familia nian” Gil haforsa liu tan.

Hatan perguntas CJITL karik anulasaun ba despacho atu la distribui fos liu husi Xefe suco ne’e tamba presaun husi publiku, Gil hatan katak desizaun ne’e laos tamba presaun husi publiku.

“Despacho ida ho numero 445/GM/MTCI/XII/2009 ne’e laos husi Primeiru Ministru mak hasai, maibe iha momentu ne’eba hau sai hela ba liur, enton hau fo hela pasta ne’e ba Primeiru Ministru hanesan MTCI interinu, nune’e despacho ne’e laos husi gabinete Primeiru Ministru nian, hau la kontra PM maibe hau hakarak defende no hadia naran Primeiru Ministru nian” Gil salienta liu tan. (Domingos/CJITL)