CJITL flash, Gabinete Prezidente Republika iha loron Domingo, 21 Marsu sei organiza eventu “Dili Metade Marathona” nudar eventu ida hodi hala’o selesaun iha nivel nasional ba grupu marathona Timor-Leste nian ne’ebe sei partisipa iha eventu marathona internasional “Dili Sidade Dame” ne’ebe tuir planu sei hala’o  iha fulan Junhu tinan ida ne’e.

Tuir komunikadu  ne’ebe CJITL simu katak prosesu rejistrasaun ne’ebe hala’o to’o loron Segunda-feira, 15 Marsu 2010, iha ona kandidatu hamutuk na’in 402 mak hakarak partisipa iha eventu ne’e, inklui reprezentante sira husi distritu.

Eventu halai taru ho distansia total hamutuk km 21, ne’ebe sei hahu no remata iha Palacio Prezidente Nicolao Lobato ne’e, sei liu husi area sira hanesan, estrada Comoro, Bebonuk, Praia dos Coceiros, Embaixada EUA nia oin to’o ba Areia Branca, no fila hikas mai Palacio Prezidente Nicolao Lobato liu husi estrada Palacio Governo nia oin.

Atletas na’in 20 (feto no mane), ne’ebe manan iha selesaun nivel nasional ne’e, sei partisipa iha programa treinamentu intensivu ida hodi hetan nutrisaun ne’ebe di’ak no aumenta sira nia kapasidade iha durante fulan tolu nia laran.

Grupu nasional ne’e sei lidere no hetan intrusaun diretamente husi heroi marathona Olympiku Timor-Leste, Agida Amaral, ne’ebe konhesidu ona nudar atleta legendaria Timor-Leste nian ne’ebe depois de votasaun historiku ba indenpendensia, reprezenta Timor-Leste hodi kompete iha Kompetisaun Olympiku Sydney iha tinan 2000.

Eventu ne’e rasik sei hahu iha tuku 6:30 dader-san. Atletas sira sei halai iha durante oras tolu nia laran Hodi nune’e, asesu ba estrada Comoro no estrada Tasi Ibun (Avenida Portugal) sei taka ba publiku hahu husi tuku 6:00 to’o 9:00 dader-san.

Seremonia fahe premiu sei hala’o iha tuku 10:00 dader ho partisipasaun husi Sekretariu Estadu Juventude no Desportu, Miguel Manetelu hodi aprezenta mos premiu ba manan na’in hamutuk ema 20. (*/CJITL)