CJITL flash, Prezidente Tribunal Rekursu, Claudio Ximenes, Kinta Feira ne'e liu husi Konferensia ba Imprensa iha Kaikoli, Dili dezmente komentariu husi Komandante Falintil Forca Defeza Timor Leste - FFDTL, Mayjor Jenderal Taur Matan Ruak katak julgamentu ba kaju KIAK ho Alberto hala'o deit iha Lingua Portugues.

"Prosesu Julgamentu ba kaju rua ne'e la uja deit Portugues, iha ne'eba iha mos Tetun" Claudio hateten.

Durante Konferensia ba Imprensa ne'e Claudio konfirma katak tribunal sempre prepara tradutor no iha esforsu oin - oin hodi ema hotu bele kumpriende prosesu julgamentu inklui kaju KIAK ho Alberto nian ne'ebe sai polemika iha publiku.

Antes Ne'e Taur Matan Ruak liu husi steitmentu ba Media katak Lian Portugues tenki para ona husi Tribunal.

Malae Internasional sira ne'ebe la hatene lian Tetun tenki duni fila ba nia rain, liu - liu Juiz, Defensor, no Prokurador sira husi liur ne'ebe la hatene koalia Tetun.

Parlementu Nasional rasik maioria aseita ho steitmentu Taur no prontu atu halo revizaun ou amandamentu se presiza.

Maske nune'e seidauk iha aktus konkretas ida husi Governu ou Parlementu Nasional hodi hasai lingua Portugues husi Tribunal maske publiku maioria aseita ho steitmentu husi Taur Matan Ruak. (Domingos/CJITL)