Jeferina Relvas/CJITL foto

CJITL flash, Partisipante kursu baziku jornalista nian ne’ebe durante ne’e fasilita husi Centru Jornalista Investigativu Timor Leste - CJITL sente kontente tebes ho formasaun ne’e tamba bele hetan matenek konaba jornalista no oinsa halo servisu investigasaun.

“Maske foin fulan rua nia laran maibe ami aprende buat barak ona hanesan teknik-teknik investigasi, teknik hakerek berita investigasi, no oinsa buka dalan atu halo investigasi,” dehan partisipante husi grupo investigativu, Jeferina Afonso Fatima Relvas, Sabdu semana kotuk iha Bairopite-Dili.

Nune’e mos, Estevão Pereira nu’udar partisipante mos sente kontente ho formasaun ne’e nia promete sei tuir to’o remata atu bele sai investigador liu husi knar nu’udar jornalista investigativu.

“Hau hatene informasaun hanesan parte ida konaba ita ema nia moris  tamba ne’e hau wainhira rona informasaun kona ba kazu korupsaun ha’u senti la satisfeitu no hau hakarak hatene hotu se mak sai nu’udar autor, tamba ne’e mak hau senti kontenti wainhira hau simu lisaun konaba investigasaun,” katak Estevão Pereira.

Treinamentu ne’ebe fornese liu husi Departementu Capacity Building CJITL ne’e ho objetivu atu prepara joventude iha area jornalista no sai hanesan investigador hodi dezenvolve nasaun foun ida ne’e.

Iha oportunidade ne’e treinador Julio Gil da Silva Guterres esplika oinsa bele halo investigasaun ba dokumentus no oinsa halo riset data hodi kompletu servisu investigasaun to’o produs istoria konaba investigasaun nian.

Atual Kordenador Jeral CJITL ne’e mos esplika katak jornalista investigativu bele mos sai hanesan Juiz publiku ba justisa sosial ida tamba bele fo sentensa ba ema liu husi publikasaun tuir evidensia ne’ebe mak jornalista investigativu hetan.

Partisipante hamutuk 23 mak CJITL perpara atu sai jornalista investigativu iha futuru oin mai no treinamentu ne’e remata iha fulan Junhu tinan ida ne’e. (Mariano/CJITL)