CJITL flash, Kondutores ba Deputadus iha Parlementu Nasional – PN segunda feira ne’e ba reporter Centru Jornalista Investigativu Timor Leste – CJITL ejiji sira nia salariu nebe durante fulan tolu ona sira seidauk simu maske kontinua service tula deputados sira ba mai.

Ba CJITL, fontes konfirmadu ida ne’be lakohi fo sai nia naran hateten katak durante fulan tolu ona mak nia seidauk hetan sira nia salariu maske durante ne’e nia asina ona kontratu iha fulan Janeiru tinan ida ne’e.

“Ami asina kontratu iha fulan Janeiru ne’e ho salariu U$230 maibe fulan tolu ona ami seidauk simu” dehan Nia segunda 22 Marcu iha Parlamentu Nasional.

Fontes ne’e informa katak iha loron ne’ebe mak sira asina kontraktu nian sempre ba hare'e osan iha banku maibe iha banku osan mamuk, iha banku dehan osan seidauk tama.

“Uluk iha 2009 ami nia salariu 130 ida ne’e ami simu lancar los maibe to’o fali 2010 sae 230 ami sedauk simu to’o agora durante fulan tolu ona” nia kestiona.

Nia informa katak deputadu uja kareta estadu tuir sira nia hakarak deit no manda kondutor sira tun sa’e deit tuir sira nia hakarak.

 

To'o noticia ne'e hatun, reporter CJITL sei tenta hasoru administrasaun PN konaba kaju ne'e. (Domingos/CJITL)