Mari'i Alkatiri, foto dok

CJITL flash, Jose Luis Guterres, Atual Vice Primeiru Ministru no lider Grupo Fretilin Mudansa (GFM) iha seremonia loron Be Mos nian horseik iha komoro, Dili haktuir katak Fretilin versaun Mari’i Alkatiri no Francisco Guterres Lu-olo tenki haburas demokrasia hodi labele bandu GFM.

“Hau so atu koalia konaba partidu nian iha sabdu ou domingo, maibe agora hau hakarak dehan deit katak hau ema ne’ebe respeitu liberdade no demokrasia tamba ne’e labele taka dalan mos ba ema seluk” Jose Luis hateten.

Iha Parte seluk, Prezidente Fretilin Mudansa, Vicente Maubossy hateten katak GFM sei kontinua luta atu hasai Alkatiri Husi Fretilin.

“Uluk ami luta atu hatun governu Fretilin, no ami konsege ona, nune’e agora ami kontinua luta atu hasai Alkatiri husi Fretilin, no ami sei konsege loron ruma” Maubossy hateten.

Nune’e mos Vicente da Conceicao Railos ba jornalistas hateten katak Fretilin laiha direitu atu bandu GFM tamba governu AMP ne’e iha forca atu ema kriminozu ne’ebe ho intensaun atu estraga demokrasia.

Antes ne’e Partidu Fretilin nia militantes sira iha Distritu Baucau liu husi retiru loron rua iha Baucau fim de semana liu ba ne’e husu ba Grupo Fretilin Mudansa atu labele uja tan atributu partidu Fretilin nian tamba iha Timor ne’e iha Fretilin Ida deit mak ida ne’ebe lidera husi Mari’i ho Luolo. (*/Domingos/CJITL)